رحلة التغيير

السلام عليكم ورحمة الله وبركاته

في يوم الخميس وأخيرا حضرت أول دوره لي في حياتي

كانت بعنوان رحلة التغيير للدكتور خالد المنيف 

الدوره كانت روعه أسلوب الدكتور سهل ومقنع ويدخل المخ وبعد الدكتور دمه خفيف ماشالله 

بس اللي استغربته أن الحضور كانو قليل يمكن لانه الخميس مادري ايش السبب

والحمدلله حصلنا على شهادة حضور 

الدكتور ذكر أشياء كثيره عن التغيير وان أحنا لازم نغير من أسلوب حياتنا الفوضوي اللي بدون هدف

أنا ماراح اقدر أقولكم كل شي بس بقول اللي كتبته واللي عجبني

1- ان التغيير مسؤليتك أنت وليس المجتمع او الدوله

يعني مو يجي واحد يدخن نقوله ليش ماتتوب يقول مااقدر كل أصدقائي يدخنون والا أبوي يدخن..طيب أنت أيش عليك منهم..؟

2- الحياه قصيره فاغتنمها

اذا ماتغيرت الحين متى راح تتغير يعني واحد يقولك بتغير اذا صار عمري 40 وفيه واحد عمره 40 يقول ياليتني تغيرت..

3-لاتخلط بين القدره والاراده

أنت تقدر تسوي كل شي لاتقول مااقدر والا صعبه لاكن ماعندك اراده فقل ليس لدي اراده..

4-لاتتطمئن لوضعك الحالي

ممكن بكره تصحى تلقى نفسك مريض لا قدر الله لان دوام الحال من المحال لاتظن أنك راح تستمر على ماانت عليه الآن..

5-دائما ماتسمع الناس يقولون (الله لا يغير عليك) هذه الجمله غير صحيحه فلابد من التغيير..

6-أنواع العقول:

1)عقول تافهه

همومهم سخيفه بسخافه عقولهم مالهم اي هدف في الحياه..

2)عقول يتحدث عن الأحداث

يعني اذا صار حدث مثل انفلونزا الخنازير يجلس يتكلم فيه وكلامه كله ماله فايده لا يقدم ولا يأخر..

3)العقل الكامل

هو العقل الذي يبحث عن الحلول للاحداث يعني مايتكلم وبس لا عنده الحلول..

7-لتكون ناجحا يجب أن يكون عندك توازن في جميع جوانب الحياه(الروحيه"العبادات"-العقليه"الثقافه"-الجسميه"الصحه"-العلاقات"صلت الأرحام"-المادي)

يعني لازم توفق بين كل جوانب الحياه مثال: أنا ناجح في عملي لاكن ما أصل رحمي..

8-سألنا الدكتور عن لماذا لا يتغير الناس..؟

كانت اجابتي كالآتي:

-ليش لديهم طوح يتغيرون من أجله

-حب الراحه والكسل

-ضعف العلاقه مع الله

-التسويف

-ضعف الاراده

-التقليد الأعمى للاخرين

9-أفعل ماتريد وليس مايريده الأخرون

الدكتور ذكر هنا قصه جحا وحماره القصه تضحك أقروها

شراء جحا حمار وكان يمشي هووولده والحمار في أمان الله مرو على مجموعه من الناس قالو:وش هالرجال شاري حمار وفي الأخير مايركبه

جحا سمعهم وعلى طول ركب الحمار

مرو على ناس ثانين قالو وش هالرجال اللي راكب على الحمار ومخلي ولده الضعيف يمشي

نزل وخلا ولده يركب مرو على ناس قالو وش هالولد العاق اللي مخلي ابوه يمشي وهو راكب الحمار

قررو يركبونه ثنينهم مرو على حقوق الحيوان قالو ياحرام مسكين الحمار راكبين عليه ثنين وبدون رحمه

في الأخير قتل جحا الحمار ههههههههههههه((مايسوى عليه على الحمار..

10-اجعل لك قدوه في كل مجال من مجالات الحياه

مثلا:واحد من أصدقائك شاطر في التجاره أنت تتعلم منه وتحاول تسوي مثله..

11-اذا اردت أن تغير من حولك فلا تعطيهم الأوامر بل الحلول..

12-مثال رائع في التغيير:اما أن تصنع مايحدث لك أو تترك مايحدث لك يحدث لك..

يعني تغير والا اذا ماتغيرت لا تعترض على اللي بيجيك..

13-لا تستعجل التغيير وايضا لاتندفع..

اذا تبغى تترك عاده سيئه مثل الادمان على الانترنت مو تقطعه مره وحده لا حبه حبه اول تجلس 5 ساعات كل مره نقص ساعه الين توصل للحد اللي تبغاه..

14-كافء نفسك بعد انجاز عظيم حققته..

15-من معوقات التغيير استصغار النفس..

16-تحدث مع نفسك باجابيه..

يعني لاتقول انا غبي انا فاشل لا قول انا ذكي انا ناجح..

17-قارن نفسك بنفسك فقل كنت كذا وأصبحت كذا ولا تقارن نفسك بالأخرين..

18-لاتخلط بين الفشلين فشل التجربه وفشل الحياه..

يعني مو واحد يجرب شي وماينجح فيه يقلو أصلا أنا فاشل دائما في حياتي..

19-ابداء بالأشياء الممكنه التي تقدر عليها..تقدر على المستحيل..

يعني أمشي لطريق التغيير شوي شوي وخطوه خطوه مافيه شي بين ليله وضحاها..

20-لن تنجح لوحدك..

أنت تحتاج للأخرين والا مشورتهم وخبراتهم فلا تتكبر عليها..

هذي أهم النقاط تقريبا اللي ذكرها في الدوره

والحمدلله أحس اني أستفدت منها كثيييير وبديت أتغير عندي كم شي ابي أغيره في حياتي وان شالله ربي يعيني..

هذي نصيحه مني لكم:اذا تبغى تتغير تغير مع ربك وحسن معلاقتك معاه وراح تتغير كل أمورك للأفضل..

أعذروني على  الاطاله لكن هذا بعض من كل