08‏/09‏/2017

لعل في الأمر خيرة..!






دائما كنت أسمع بعد كل مشكله أو حادث جملة "لعل في الامر خيرة"
حقيقتا لم أكون أستوعب معناها كما يجب وكانت تمر علي كغيرها من كلمات التطمين والمواساه بعد كل مشكله او موقف أتعرض له
لكن! الان كلما أكبر وتمر بي التجارب والأحداث وأقابل أشخاص جدد وأخرين يذهبون
بدأت أستوعب معناها وللأمانه بدأت أرى الخيره ولو بعد حين

المشكله ليست دائما مشكله كما نعتقد بعض المشاكل تكون "خيرة"
فمن خلال المصائب التي تمر علينا نعرف من الصاحب الحقيقي ومن يحبك فعلا ومن يتمنى لك الخير ومن العكس من ذلك

مثال
بين الزوجين في حياتهم تمر بهم أحداث كالمرض والفراق 
من خلال تجربتي المتواضعة أحداث كالمرض مثلا قد تقوي علاقتهما أكثر حتى من المواقف السعيدة
وقد يظهر كلا الطرفين أمورا لا يعرفها الأخر عنه كالتضحيه والاهتمام قد لا تظهر في أي وقت أخر
وحتى أنت تكتشف في نفسك صفات كنت لاتعرفها عن نفسك من قبل

مثال أخر 
أصدقاء لديهم علاقة مثل الأخوه بل وأعظم 
يتعرض أحدهم لمشكله فجأة يختفي جميع الأصدقاء من حوله ويبقى واحد
نعم هذا الموقف كان خيرة له ليعرف من الصديق الحقيقي ومن صديق المصلحه

من هنا جاءت فكرة لعل في الأمر خيرة 
وهذا جزء بسييط من الخيرة وماخفي كان أعظم 

دائما عندما تواجهكم مصيبه من باب تهدئة النفس 
أبحثوا عن الخيرة فيها 

قال لي أبي مره (المشاكل لاتأتي من الله كل مايأتي من الله خير حتى لو لم يعلم الانسان ماهو هذا الخير)

فضفضه صغيره خطرت على بالي فدونتها


04‏/03‏/2017

فضفضات أيفونيه جديده :")

السلام عليكم ورحمة الله وبركاته

كيفكم..؟
اشتقت للمدونه مره من زمان عنها

||

وبعد تقريبا ٧ سنوات لاستخدامي لنظام الأندرويد اليوم ولاول مره أجرب الايفون نظام الاي يو اس مو جديد علي بحكم أمتلاكي للايباد من أكثر من خمس سنوات
لكن مو مثل لما تستخدمه بشكل يومي وطول الوقت لما يكون بالايفون

ولاني قلت بتويتر اني راح أتكلم بصراحه عن النظامين اول مااجرب الايفون بشكل كافي
فكانت هذي التدوينه

||

بحاول أقارن بين النظامين كامستخدم عادي لاني مو تقنيه ولا أفهم فيها كثير

أول شي افتقدته بعد أستخدامي للايفون الخيارات المتعدده وسهوله التنقل بين التطبيقات بكل سلاسه
بصراحه الايفون يفتقد للخيارات اللي تختصر عليك كثير من الخطوات ومحد راح يفهم انا وش أقصد الا اللي جرب النظامين 
في نظام الاندرويد حريه اكبر في الاعدادات والخيارات وحتى الخيارات اللي داخل التطبيقات بعكس نظام الاي او اس اللي تحسه مقيدك كثير
وكامثال بسيط لما أشارك صوره او فيديو من الاستديو للواتس اب تظهر لي نافذه لعملية النقل وهذي مزعجه جدا بالنسبه لي لاني مااقدر استخدم الاستديو لم يخلص النقل ويتم الارسال

||

سرعة الأنترنت بالجلكسي كان طياره بالنسبة للايفون جدا بطيء النت فيه خصوصا لما تكون بعيد عن شبكة الانترنت بينما في الجالكسي حتى لو كنت بعيد عنها توصل وتكون سرعتها ممتازه

الجالكسي يقدم لك خيارات مفتوحه تتحكم من الجهاز من الى اما الايفون جهاز جامد مثل ماجاك خذه والا بكيفك 

من ناحيت التصوير كل الجهازين تصويرهم حلو ولسبب ما حابه تصوير الجالكسي أكثر لكن يفوز الايفون في تصوير السناب بصراحه هو الافضل

من ناحية الشكل الخارجي للجهازين من قبل لا أمتلك الايفون وانا معجبه بنعومة تصميهم وبساطته صحيح أجهزت الجالكسي مو سيئة لكن هنا النقطه تحسب لصالح الايفون

عدم وجود ذاكره خارجيه للايفون شي أفتقدته وميزه تحسب لصالح الجالكسي ممكن البعض مايشوفها بذيك الاهميه لكن أنا أشوفها مهمه جدا

||

الخلاصه لي قرابة الشهر تقريبا من استخدامي للايفون أنتظر الشي اللي راح يبهرني فيه وأعرف سبب أنفتان عشاقه فيه وكرههم بالمقابل لنظام الاندرويد لكن ماحصلت ولا ميزه يتفوق عليها على جهازي اللي أقدم منه بسنتين الا في موضوع التصوير وفي السناب فقط وتراني أتكلم بكل صدق والله ماتحيزت لا للايفون ولا للجالكسي
بس تعرفون لما تسمعون مدح مدح لشي ماجربته بعدين تجربونه وتقولون بس طيب عادي كل هذا موجود عندي وزياده عليه بالضبط هذا اللي حسيت فيه 



11‏/10‏/2016

أطفال مشاهير..!

السلام عليكم ورحمة الله وبركاته


كثر عندنا في الأونه الأخيره في "السوشل ميديا" أو مواقع التواصل الاجتماعي
ظاهرة "الشهره" وان كل من "هب ودب" صار يقدر يصير مشهور بسهوله وبدون مجهود
حتى لو كنت شخص تافه او فاشل في حياتك انت تقدر بكل بساطه ترفع جوالك وتتكلم عن أي موضوع وتنزله ويجونك كثير أشخاص يتابعونك وانت ببساطه انسانه "ماعندك سالفه"
او ممكن تكون انسان "زاحف" وتنزل لك مقاطع تخالف عادات الناس وتقاليدها 
ويبدون الناس يتكلمون فيك وبالنهايه تصير مشهور

عموما تعدد أنواع المشاهير وأسباب شهرتهم
اليوم بتكلم عن المشاهير الأطفال!


كثرت مقاطع الرقص للاطفال خصوصا البنات ماادخل الانستقرام الا لازم يطلع لي كم مقطع لهذولي الأطفال
فا تدخل الحساب تحصل بنت عمرها من ٧الى ١١ سنه كل المقاطع الموجوة بحسابها رقص
والصدمه المشرف على حسابها امها او أحد من أهلها

أسمحولي أتكلم بصراحه شوي
بأي حق تتخذين قرار أنك تدخلين هالطفله عالم الشهره صحيح هي بنتك لكن مو من حقك
مو لانها صغيره ومالها قرار ولا رأي تستغلين طفولتها عشان تدخلين لك كم "قرش" في جيبك على حساب هالطفله

وللأسف تلقى البنت تصور وترقص وتسوي حركات "تميلح" مالها أي صله بالبراءه والطفوله
ناهيك عن اللبس والميك اب 

الام اللي دخلت بنتها عالم الشهره أرتكبت ذنب في حق طفلتها يمكن ماراح تجني أثاره السلبيه الحين 
يعني بالله مافكرتي هالبنت بكره لما تكبر ايش راح تكون؟
ماخفتي عليها؟
مافكرتي لما تكبر وتواجه الناس او حتى تبدا تقراء تعليقات الناس على حسابها ان هذا ماراح يسبب مشاكل نفسية لها؟


أحزني مره مقطع لوحدة من هالاطفال المشاهير
كان عندها جلسة تصوير وجايه ميك اب ارتست بتسوي لها المكياج
البنت تبكي تبي تروح تلعب وامها تجبرها تجلس على الكرسي عشان تمكيجها 
ويحطون لها الكحل والبنت تبكي لانه يعور عينها طيب ليش كل هذا؟
خليها تعيش طفولتها 
بالله سؤال لكل ام دخلت عيالها هالمجال ماتحسين بالذنب؟
شي مخجل لو فكرتي فيها انك سويتي هالشي كله عشان يكون لك مصدر دخل من الاعلانات اللي تسويها بنتك!

ملاحظه: أنا مااتكلم عن الناس اللي تصور يومياتها بشكل عادي أتكلم عن اللي يتاجرون على حساب اطفالهم 

شاركوني رايكم بالموضوع!




08‏/09‏/2016

تقرير زيارتي لمطعم نوزومي الياباني



السلام عليكم ورحمة الله وبركاته 

كيفكم..؟

تدوينة اليوم تقرير لزيارتي لمطعم نوزومي من زمان عن هالنوع من التدوينات 
أول شي نوع المطعم ياباني فا اللي مايحب البحري ابدا ماراح يناسبه الأكل

لكن اللي يحب البحري "مثلي" بيعجبه لانه اكلهم لذييييعععذ

أنا زرت المطعم مرتين المره الأولى كانت تجربه جيده من ناحية السوشي لكن لم اوفق في طبق الرز كان "مو ذاك الزود"
لكن التجربه الثانيه كانت ناجحه بكل المقاييس

المكان

شويه عليه كلمة رااااقي ورايق 
الديكور جميل وانيق بموسيقى هاديه وإضاءة خافته تدخلك عالم ثاني

الخدمة

لطيفييين الموظفين حقينهم وخدومين
يعني من جد يدلعون الزبون
وماتأخرو في تقديم الأكل هذا اهم شي


الأكل

أنا جربت عندهم السوشي والديناميت شريب والرز بالمأكولات البحريه
السوشي بدون مبالغه أفضل سوشي جربته بحياتي وأفضل الموجود في مدينة الرياض
لذيذ لا يعلى عليه وهو سبب تكرار زيارتي للمكان
اللي يحب السوشي ضروري وفرض عين يجرب حقهم بيحس انه كان ملعوب عليه اول
والجميل في الموضوع انهم يقدمونه ساخن انا دائما اكله بالمطاعم بارد لكن حقهم ساخن
وانصحكم بهالنوعين Mr Chan Roll -  والثاني مالقيت اسمه بس كل النوعين موجودين في الصورة اللي فوق

الرز قلتلكم جربت اول عندهم نوع ناسيه اسمه بس ماعجبني ان ماخاب ظني فاهو الرز بالفطر
المره الثانيه جربت رز بالمأكولات البحريه
كان لذيذ وغريب يستحق التجربه 
هو ريزتو مع قطع جامبري وكلاماري انا حبيييته لذيذ وغريب

الديناميت شريب انا راضيه على هالوجبه ماقد كلتها في مطعم وصارت سيئة
الموجود عندهم برضو لذيذ يستحق التجربه

المشروبات

جربت الموهيتو بالتوت اممم
احسه كان عادي جدا مليان ثلج مره مكثرينه اكثر من المشروب نفسه
يعني عادي مو ضروري تجربونه او جربو نوع ثاني يمكن اختياري ماكان موفق

الأسعار

وما أدراك ما الأسعار
المطعم فعلا غالي بس يستاهل كل ريال يندفع فيه
بس لا تروحون له دائما بتفلسون

اللي جربت المطعم تقولنا رايها ووش أحسن شي جربته عندهم

04‏/08‏/2016

MY FAVORITES! .. مفضلاتي

السلام عليكم ورحمة الله وبركاته

أشتقت للمدونة
شخباركم..؟!

جهازي جديد ولا فيه فوتوشوب وانا لازم تكون الصور حلوه والا ماانزل تدوينه عرض المدونة
بس مره قفلت معي وسويت لها ايديتنغ بتطبيق في الجوال فا غضو البصر عن جودة الصور
||

بتكلم عن شويه منتجات حابتها هالفترة

 Giorgio Armani Luminous Silk Foundation

فونديشون ارماني
يجنن يجنن خفييف على البشره تغطيته متوسطه مايغطي كل العيوب بس حلو مايكتم البشره 
يعطي لوك صحي مترطب
اخذته من مبيعات الطياره
سعره ٢١٥ تقريبا
||

Urban Decay Naked Skin Concealer

احسن كونسيلر بالنسبه لي
احسن حتى من نارس اللي طايرين فيه الناس
مايخطط ابدا ابدا ويغطي زين ولا يقلب لونه ولا يتكتل
اللي تبي كونسيلر زين لاتتعدا هذا
العلبه الاولى خلصتها في اقل من شهر وهذي الثانيه
١٠ على ١٠
||

Rimmel Moisture Renew Lipstick

لسا توني شاريه هالروج بس حبيته من اول نظره
لونه موف على بينك مررره جميييل
تركيبة الروج ذكرني بارواج ماك
رقم هالدرجة ١٨٠
واحسن شي ارواجهم رخيييصه اظن سعره ٤٥ هالحدود

17‏/10‏/2015

تقرير زيارتي لمحل فلوريست


السلام عليكم ورحمة الله وبركاته

تقرير صغير بسيط للمحل الجميل فلوريست
المحل لتغليف الهدايا وصاحبته البنت الرهيبه قورجس

أنا لما زرت المحل ماكان لي نية أكتب عنه فا للاسف ماعطيته حقه من التصوير
والتصوير كان بالجوال
المكان أنيق ومرتب الديكور يصيح ودك تاخذين كل شي بالمحل
ماشالله عليهم الله يبارك لهم صراحه ذوق وابداع في كل شي
>>محد كان يدور بالمحل ووده ياخذ كل شي وكل ماشاف شي يقول اللللله يجنن
والحمدلله من حسن الحظ ماكان فيه الا انا بالمحل


||

والمميز عندهم ان كل شي من تصميهم حتى التغليفات حقت الهدايا خاصه فيهم والتاقات والميسن جار اللي تعتبر 
الشي اللي يميزهم وعندهم صناديق وأفكار حلوه لتغليف وبرضو ورود

طريقتهم في التغليف مره تجنن غير تقليديه ومرتبه وتواجه بصراحه
والاهم أسعارهم جدا جدا معقوله صراحه ماتوقعتهم كذا مره رخيص

||

أنا رحت لهم عشان أغلف هدية لأختي العزيزة
وهذا شكلها النهائي بعد التغليف


شايفين الجمال والرهابه اللي فوق>>رهابه من كلمة رهيب
اناقة لأبعد الحدود 
تخيلو هالجمال كله بس بـ١٥٠ ريال
(التغليف-الصندوق-الشوكلاته-الخدادية-التاق)
والشوكلاته ترا مره لذيذه عطاني وحده أذوقها الموظف

||

المحل جميل انيق مرتب غير تقليدي
أي وحدة تبي تغلف هدية تواجه لاتتردد تروح لهم 

حسابهم في الانستقرام florist_sa@


03‏/10‏/2015

صابونة توني مولي :Review


السلام عليكم ورحمة الله وبركاته 
واو موضوعين ورا بعض ماعرفت نفسي

موضوع صغينون عبارة عن ريفيو لصابونة توني مولي الكورية
الصابونه مخصصه للبشرة اللي تعاني من الروس السوداء والمسام الواسعة
والصابونه هاند ميد فامكوناتها طبيعية

العلبة تحتوي على بيضتين وحدة بيضا لنهار والثانيه بنيه لليل
لي شهرين تقريبا استخدمها ولا خلصت ماشالله احس انها ماذابت بسرعه مع ان حجمها صغير يعتبر

||

رايي فيها
الصابونه جميلة مااقولكم انها الحل الافضل للمسامات لكن تعطي نتيجه حلوه تشد البشره وتصغر المسام بشكل متوسط
وتنشف البشره من الدهون تماما فا تحتاج ترطيب كويس بعدها

بصراحه انا كنت مستحقرتها ماتوقعتها بتسوي اي شي لكن جيدة
الرووس السودا خفت كثييير 
انا احب استخدمها مع الكلارسونيك قبل الميك اب عشان تنظف المسام وتشد البشرة والنتيجه تطلع مره حلوه
التعليب حقها كيوت لكن مو عملي ابدا لانه عباره عن كرتون فا مع المويه ينعدم

اقيمها ٧ من ١٠

||

انصح فيها للبشرات الدهنيه واللي تعاني من مسامات البشرات الجافه يبعدون عنها تماما

تحصلونها بامازون او تاجرات الانستغرام
انا اخذتها من امازون سعرها ٩.٢٠ دولار
اللي جربتها تشاركني رايها..!


02‏/10‏/2015

التدوين مهدد بالاندثار..!


السلام عليكم ورحمة الله وبركاته


كثير من المدونات الصديقة التي كنت أتابعها أصبحت مهجوره او أصحابها أغلقوها للابد
جدا احزن لما اشوف مدونه مهجوره او مقفله خصوصا لما تكون من المدونات اللي كنت اتابعها كثير

بصراحه حتى انا قل تواجدي هنا لكن احاول بقدر الامكان الدخول بين فترة لثانية
عشان أقراء التعليقات وارد عليها وايضا احاول اكتب تدوينات جديده لكن فجأة "أهون"

||

طبعا كلنا نعرف سبب هجران الناس لتدوين وهو بسبب مواقع التواصل الاجتماعي "سناب شات ، تويتر ، باث....الخ"
لكن ماحصلت فيهم نفسي مثل لما أكتب في المدونه في المدونه احس اني نفسي اللي أحبها لكن في باقي المواقع احس اني نفسي اللي ماأحبها!

في الانستقرام ناس "تهايط" وتفاخر مين عنده أحسن من الثاني مين حياته خالية من الهموم والمشاكل أكثر من الثاني
في السناب شات الناس تحولو لمهرجين عشان يحصلون أعلى نسبة مشاهدة طيب وبعدين..؟
لما كنا في المدونه كنا نكتب عشان أنفسنا مو عشان شهره والا فلوس كنا نكتب لشي اللي نحبه وبأسلوب بسيط خالي من التكلف

||

لما تنزل صورة في الانستغرام تلقى التعليقات توصل لألف تعليق لكنها عبارة عن "سب وشتم ، دعايات ، نقاشات عقيمه"
لما كنا بالمدونه كل الناس اللي تكتب لك تعليق تكتبه لانها تحبك تكتبه لان كلامك أعجبهم والتعليقات ما تتجاوز العشرة

في تويتر التطبيق المفضل في السابق الان مجرد أدخله أحس بالحزن "أخبار سياسية ، حروب ، قتل ، عنصرية"
لما كنا بالمدونة كنت أحس اني أعيش في سلام وأن الدنيا بخير

لما كنا بالمدونة كنا نكتب عن أهتماماتنا وكل شي نحبه حتى لو كان بسيط او حتى سخيف بدون مانفكر براي أحد فينا وكأن المدونه نوت أسجل فيه اللي بخاطري ومحد راح يقراها

||

أشتقت لذيك الأيام أدخل للمدونات الصديقة أتابع جديدها أقراء كل تدويناتهم بأهتمام 
وأحط تعليق في أخر الموضوع

أشتقت أدخل للمدونه وأرد على تعليقات المدونات الصديقة وأقراء كلامهم اللطيف

كانت هذي مجرد فضفضة صغيرة بخاطري من زمان
وان شالله اني بعقل واصير مدونه شاطرة مثل اول

أنتو وش رايكم..؟!



30‏/06‏/2015

تجربتي مع عملية الليزك


السلام عليكم ورحمة الله وبركاته
ادري اني قاطعه وكل شي اول شي كل عام وانتم بخير..
 ثاني شي شاحن لابتوبي خرب وكل يوم اقول بكره بشتري ومرت الايام والشهور ولا شريت حاليا استخدم الجهاز الثاني بس مشكله مافيه فوتوشوب

{}

المهم خلونا في موضوعنا ولله الحمد والمنه طلقت نظارتي الطبيه بالثلاث وسويت عملية الليزك وجايه اليوم انقلكم تجربتي 

العملية كانت سهله سهله اسهل من ماكنت متوقعه

بالبدايه انا ماكنت متحمسه ابدا اسوي العملية وكنت خايفه شوي الصدق
امي ماخذت لي موعد من سنتين في مستشفى قوى الامن وكل مره ياجلونه وحاله تعرفون حكومي وكانت امي اللي يضيق صدرها لما يرسلون رساله بتاجيل وانا ولا كان الموضوع يعنيني 

حتى انها تحمست قبل اتزوج وودتني مستشفى خاص قالت خلاص سويها ورفضت

{}

المهم نرجع لسالفتنا ارسلو رسالة انو يانورة عمليتك في اليوم الفلاني الساعه العلانيه 
رحت مع ماما على الوقت كانت الساعه 12 الظهر دخلنا انتظرنا شوي بعدين نادوني سوولي الكشف العادي حق دايما

بعدين لبسوني لبس العمليات وجلست انتظر الغرفه فيها يمكن 8 حريم وبالدور يسوي لهم العملية طلعت وحده منهاااره تقول الله يعينكم يابنات طبعا انا خفت مره
 كلمت امي قلتلها ماما في وحده تقول العملية تخوف يحطون سكاكين في العين ومدري ايش قالت لا ماعليك منها تبالغ المهم انها روعتنا كلنا الله يهديها
شوي نادوني حطولي قطره تعور ماقدرت افتح عيني منها بس شوي ويروح هالاحساس
دخلت حطوني على السرير وحطو فوقي لمبه صفرا شوي جا الدكتور
فكرة العملية لو اشرحها تخوف بس بالواقع ماتحسين بشي اول شي يحطون بنج موضعي على العين نفسها بعدين يمسكون جفون العين بزي الحدايد عشان ماترمشين بعدين تطلع نقطه حمرا يقولك ناظريها هو يبدا يحط العين باداه حديده صغيره >>هذي اللي تقول عنها سكين

بعدين يشغل زي الهوا يطلع ريحه زي الحرق غريب بعدين ركبو لي زي العدسات اللاصقه وقالي يله مبروك 
انا من الصدمه قلت بس كذا؟؟
 خلصنا قال ايوه روحي البيت انا اناظر سقف الغرفه صارت واضحه الخطوط اللي فيه اول ماانسدحت ماكنت اشوفها وانبسسسطت سبحان من علم الانسان مالم يعلم حطولي قطرتين وطلعت مبسوطه وفي الطريق متشققه اني اشوف اللوح زين طبعا لاني كنت عميانه قبل العملية

{}

رحت بيت اهلي تغديت بعدها بنص ساعه بدا يفك البنج جاني الم مميت
 خفت ان العمليه فشلت الم مو طبيعي ولا تقدرين تفركين العين ولا تسوين شي كلمت المستشفى ابكي وانا اكلم حقت الاستقبال اقولها بجي المستشفى بموت الم الم قالت طبيعي لازم يجيك هالالم جلست ثلاث ايام على هالحال الم ولا اقدر افتح عيوني ابدا الا لضروره حتى النور يضايقني

بعدين قالت لي وحده الله يجزاها خير سوي دخون بالكمون وتدخني من بعيد لا تخلينه مباشره على العين والله سويته بدا يفك الوضع شوي شوي معاي وبلعت لي حبة بروفين والحمدلله جتني العافيه سويت هالدخون مرتين ومن بكره مره وحده والحمدلله

الحمدلله الالم راح تماما اليوم الرابع تقريبا واستمريت على القطرات اللي عطوني 

{}

بعد 10 ايام رحت لموعد وبيفكون لي العدسه المؤقته اللي حطوها فكها لي عادي زي العدسات العاديه 
النظر عندي حاليا متقلب مره يصفا ومره لا بس قالي الدكتور طبيعي يبيلك ثلاث شهور عشان يثبت النظر

وقالي تقدرين بعد اسبوع تحطين كحل وتسوين كل شي عادي>>اهم شي


والحمدلله على هالنعمه العظيمه والله اللي جرب النظارات انها قلق وتخرب الشكل لكن الحمدلله اللي فكنا


22‏/12‏/2014

Review: it FACTOR .. مراجعة لمجموعة ات فاكتور




Hi
قررت اترك الكسل عني شوي واكتب ريفيو صغير عن هالموجموعة من ات فاكتورلي
من فتره طويلة شاريتها وكل مره بتكلم عنها يداهمني الكسل

المجموعه هذي فايدتها انها تساعد على تجفيف الشعر في اسرع وقت ممكن يعني اسرع من الوقت اللي بالعادة ياخذه شعرك عشان ينشف يعني تقريبا 40٪
أنا احب استخدمها لو عندي مناسبة عشان ينشف شعري بسرعه ويمديني أستشوره

 الشامبو ريحته جميييله اهم شي انه خالي من السولفيت فا ماراح يكون فيه رغوه كثير حبيته الشامو لطيف على الشعر وماينشفه قوامه ثقيل شوي وشفاف
البلسم كانه كريم ثقيل شوي تحطينه بعد ماتغسلين شعرك بالشامو بس على اطراف الشعر يطري الشعره ويعطي لمعه حلوه لشعر برضو مايخلي الشعر يتعقد

الكريم/ السيروم بعد الشور انشف شعري بالمنشفه واحط منه 3 ضغطات او حسب طول شعرك واوزعه على كامل الشعر بطريقة عشوائية جمييييل هالمنتج اكثر شي حبيته في المجموعه صرت استخدمه بعد كل شور حتى لو مااستخدمت المجموعه كامله يساعدني كثير على تمشيط شعري لانه يعاني من تعقيد بسبب الصبغه

أماكن الشراء
موجود في بعض المشاغل الكبيرة
انا اخذتها من مشغل الجمال والنقاء بالرياض شارع العليا
وموجود في مشغل جويل

سعر المجموعة
اذكر انها ٢٠٠ وشي مااتذكر بالضبط

05‏/10‏/2014

Review Benefit The POREfessional .. مراجعة بوردة بنفت ذا بورفيشنال

السلام عليكم ورحمة الله وبركاته 

كيفكم ياجميلات..؟
كل عام وانتم بخير

ريفيو لبودرة بنفت الجميلة
البودره مخصصه لاخفاء لمعان المناطق الدهنيه 
التي زون مثلا انا اعاني منه الانف من اكثر المناطق اللي تدهن في وجهي 
فالما استخدم هالبودره تعطي مظهر مطفي وصافي حتى المسام تخف ولو استخدمتي معاها برايمر بنتف تصير النتيجه بيرفكت
انا من الناس اللي احب اللوس بودر اكثر من الكومباكت بودر لاني مااحسها تتكتل ولا تعطي شكل مغبر

البودره شفافه بدون لون احب اوزعها تحت العين عشان اثبت فيها الكونسيلر تعطي شكل نظيف للوجه


اكثر شي اعجبني العلبه الرهييبه دائما بنفت يسوون حركات ابتكاريه وغير تقليديه يعجبني فيهم هالشي كثير

العلبه لها غطا عشان تحطين فيه البودره وتوزعينها بالفرشة حقتها تجي تحت العلبه وجودتها جيده وتفي بالغرض 
العلبه صغنونه وتنشال في الشنطه وعمليه مررره حبيييتها

سعرها ١٤٦ ريال
اماكن الشراء سيفورا - وجوة

انصح فيها؟
ايوه خصوصا اللي بشرتهم دهنيه صراحه حبيتها صرت مااستغني عنها
شي ماعجبني فيها؟
ولا شي يمكن ثباتها مايطول

مين جربتها تقولي رايها فيها؟



11‏/09‏/2014

Review Vitamin E Body Treatment Scrub ❤❤


                                                        السلام عليكم ورحمة الله وبركاته 
اليوم ريفيو سريع عن هذا السكراب الفخم
من جو مالون لندن 

عجيب جدا هالسكراب 
ينظف ويقشر من قلب وترطيبه عالي عالي عالي
حتى اني مااحتاج ارطب بعده 

ريحته ممكن تكون مزعجه للبعض لانها قويه 
حاولت اوصف الريحه بس ماعرف وش تشبه له هالريحه
مدري وشلون غريبه شوي
انا متقبله ريحته 
اللي بتشتريه تشمه قبل عشان ماتتورط

يحتوي على فايتمين شي ومضادات للاكسدة




العلبه حقته كبيره اتوقع تكفي لست شهور قدام
وشكل العلبه فخم وعملي 

طريقتي في استخدامه احطه على كامل الجسم وهو جاف بعدين اخليه ٥ دقايق او على حسب
وبعدها اغسله 
بعدها يعطي نعومه وترطيب مو طبيعيه 
يجلس الجسم يومين تقريبا محافظ على النعومه 
وريحته تجلس في الملابس لما تغسلينها 

طبعا مو هذي اول مره اجربه هذي ثاني مدري ثالث علبه اخلصها منه 
عيبه الوحيد انه غالي ٥٠٠ ريال تقريبا 

بس والله يستاهل 

اللي قد جربته تكتب رايها فيه 
واللي ماقد جربته تجربه وتعلمنا



30‏/08‏/2014

Back To School .. MakeUp / ميك اب لدوام والجامعة


السلام عليكم ورحمة الله وبركاته

بدت الدوامات الله يعينا وياكم على هالترم ونختمه بكل نجاح وتوفيق
المهم البوست لبنات الجامعه الجديات على الجامعه بس بعطيكم شوي نصائح ميك ابيه 


 الفونديشون
صراحه انا احط فونديشون وكل يوم احط نوع مو كل يوم نفس الفونديشون
بس باخر الترم اللي فات صرت بس احط واقي شمس وكونسيلر وبلشر وروج وامشي للجامعه
والله حركه مو سيئة
ولاني وقتها مالقيت بي بي كريم يناسب بشرتي والفونديشون يتعب الوجه 

الحلو في الفوندشون تغطيته اعلى ويدوم وقت اطول 
لو حابه تستخدمين فوندشون كويس وتغطيته خفيفه ولا تضر البشره ان شالله
عندك تبع كلنيك اسمه ايفن بتر او فيت مي من ميبلين او هلثي مكس كلهم حلوين ويعطون اشراقه حلوه للوجه

البي بي كريم 

فيه كثير انواع  بي بي كريم انا ماجربتهم كلهم
لكن افضل اثنين جربتهم الى الان حق غارنيه الطويل وحق تو فيسد 
مره كويسين ولا يتعبون الوجه



الكونسيلر 



ترا بالنسبة لي الكونسيلر لدوام اهم من الفونديشون
يعطي شكل مصحصح من جد خصوصا لما تحطينه تحت العين 
عندك حق تروماتش وميبلين ينورون المنطقه وثابتين ويخفون الهالات ولا يقلبون رمادي


الارواج



بما انه صباح اختاري ارواج بين الوردي واللحمي الوان هاديه مو قوية ومزعجة
يعني عنابي مثلا مره لا لاتحطينه ولا الاحمر 
فيه بنات يحطون عنابي على بنفسجي على اسود مدري وش ذاك اللون مره لا وش ذا اللون الله يهديك في زواج وعسانا نتقبله
صراحه انا يناسبني الالوان الغامقه شوي على بنفسجي لكن احاول مااكثر منها او اخففها شوي لان الفواتح تهدي ملامح الوجه واهدا للعين

23‏/08‏/2014

My CÉLINE Bag ❤



السلام عليكم ورحمة الله وبركاته
انا في قمة السعااادة بالله كيف بنتي الجديده تجنن صح؟
اخيرا شرفت ست الحسن والجمال

امس شريتها وحاطتها على الطاولة قدامي وبس اتمقل فيها وانا رايح والا جايه .. طبعا انا عشقي الشناط وسيلين من اكثر الماركات اللي وقعت في غرام شناطهم
انا رحت لمحلهم ثلاث مرات ابي اشتري وكنت حاطه ببالي جحم النانو
بس مالقيت شي دخل قلبي وانا عندي شبه قناعه ان اللي بيشتري سيلين لازم يشتري اللي فيها لونين او ثلاث الوان او لايشتري لان السادة موجود عند كل الماركات ويشبه التقليد فا ماتحسين بالتميز وبرضو يتكرر
لاني لما سالت صاحب المحل قالي هذي منها حبه وحده معد تنزل مره ثانيه فا هذا الشي حمسني اكثر

المهم بقولكم سالفتي لما دخلت المحل ماكنت مره صامله بشتريها وانا ادور الا اشوف بنت ماسكه شنطه وباين انها طايره من الفرحه تكلم اللي معاها وتضحك فرحانه وقالت لرجال عطني اياها(تقصد الشنطه) ومرره مبسوطه البنت وصورتها وحاله .. طبعا انا اختكم في الله شفت الشنطه اللي معاها ووقعت في غرامها
فجأة البنت طلعت وخلت الشنطه .. طبعا انا طيران عند الكاشير قلت له طلعلي الشنطه اللي تو .. وحاسبت وشريتها والحمدلله


الشنطه تتكون من ثلاث الوان عنابي وعودي وفوشي غامق .. انا كان ودي بشي فيها ازرق بما انه لوني المفضل بس خلاص مليت من الانتظار .. هذا المقاس يسمونه لجيج .. تقريبا هو الحجم الوسط 

صاحب المحل قالي فيه تبديل لمدة اسبوع الله يهديه ليته ماقالي هالمعلومه لان جاني تردد ابدل ماابدل !!
في النهايه قلت لا ماراح ابدلها هي اكثر شي حبيته من بين كل اللي كانو معروضين

هنا صورتها في الموقع (ترا اللون الفوشي اهدا من كذا)

مبروك على الشنطة والله يهنينا ويسعدنا سوا


13‏/08‏/2014

My Beauty Favorites .. مفضلاتي التجميلية

السلام عليكم كيفكم ياجميلات..؟

وحشتني المدونه .. انشغلنا برمضان بعدين العيد بعدين احترت وش اكتب موضوع 
وبرضو الكام جديده لسا ماتعودت عليها لان القديمه نيكون والجديده كانون فاشوي ماعرفت لها
 المهم

بوست اليوم مفضلاتي التجميلية للفترة اللي فاتت


بي بي كريم من تو فيسد 
اصلا هو حق اختي ولما شرته كنت معاها وكانت بشرتي ذيك الايام تعبانه وجافه وحاله فا ماتحمست له 
شرته اختي وصارت تمدحه وشكله صدق حلو على الوجه فا اخذت حقها لانها شرت جديد جربته وحبيييته 
يعطي الوجه اشراقه حلوه تغطيته خفيفه بس حلوه يخلي الوجه فريش 
لو يخلص اكيد راح اشتريه


مسكرة حواجب من محل في اسواق طيبه 
هذا حسابهم في الانستقرام @ostacom
طبعا انا طايحه بمسكرات الحواجب لان شعري فاتح وحواجبي عريضه وسودا فا هذا الاختراع مره ناسبني
انا جربت حقت سيجما وحقت الف حلوين لكن هذي احلا منهم بكثير ودرجتها فاتحه حلوه مره
وفيه منها درجتين اغمق ودرجه افتح كاني مو غلطانه
تثبت الحاجب ماتخلي الشعر يتحرك وتفتح لونه وتثقل الشعره شوي 


فونديشن من ميبلين استخدمه للكونتور
مره حلو وسهل في الاستخدام احطه وادمجه بالبيوتي بلندر بعدين اثبته ببودرة باهاما ماما تكلمت عنهم في الانستقرام


22‏/07‏/2014

Eid Beauty Haul / مشتريات العيد التجميلية



السلام عليكم ورحمة الله وبركاته 
كل سنه وانتو بخير العيد هالمره تجهيزاته كانت خفيفه الحمدلله خلصت لبسي من بدري لاني فصلت لي كم شي ونويت واحد منهم للعيد والله الخياط فله راح اعتمده واسحب على السوق المفعن
المهم احلا فقره في تجهيزات العيد مشتريات البيوتي
شريت ميك اب واشياء للعنايه بالبشره والشعر بس ماحبيت اكتب عنها في موضوع المشتريات ممكن اسوي ريفيو عنها بعدين

نبداء

روجين حلوين من سيفورا احب هالنوعيه من الارواج عندهم
اللي يسار كان عندي منه وخلص والحين رجعت اشتريه يجنن اللون لايفوتكم طبيعي وكنت استخدمه اكثر واحد في الجامعه
 رقمه ١٢

الثاني قالت لي الموظفه حلو خذيه وجربته وحبيته
لونه اتوقع قريب للمشمشي
رقمه ١٩


مسكرات ميبلين غنيه عن التعريف بس هذي اول مره اجربها
انا عندي البنفسجيه والصفرا
هذي شوفت وحده اجنبيه في اليوتيوب تمدحها ودايما تستخدمها قلت يله اشتريها


ارواج بورجوا الجديدة
صدق ريحتهم مفعنه زي ماسمعت ريحتهم شي كيماوي
بس الارواج نفسها ت ه ب ل 
اول ماتحطينهم يصيرون رطبين بعدين يجفون مع الوقت ويصير ثاابت ثباتهم جيد انصح فيهم للمناسبات
اللي يسار رقمه ٧ والثاني رقمه ٥


هذي المجموعه من اول مانزلت وانا حابتها والسبب الباليت اللي فيها الوانه حلوه وسعره رخيييص تخيلو كل هذي الاشياء 
كحل-مسكره-برايمر-باليت-وشنطه بـ١٨٥ بس 
مره حلو سعرها طبعا رحت وجيت عليها متردده اخذها والا لا في الاخيره اخذتها
لسا ماجربت شي منها بسوي لها ريفيو يمكن