02‏/01‏/2011

عام جديد وأماني جديدة


السلام عليكم ورحمة الله وبركاته 

كل عام وانتم الى ربكم أقرب 
وكل عام ومدونتي في تقدم أكبر
قبل يومين بدت السنه الجديده الله يجعلها سنه خير على الجميع هو المفروض التودينه هذي كانت لما بدت السنه الهجريه بس هذاك الوقت ماكنت فاضيه او ماجا على باللي مدري ايش السالفه بالضبط 

المهم أحس ناس كثير متفائلين في السنه الجديده ومتحمسين لها كثير 
أنا من ضمن هالناسات بس في نفس الوقت خايفة اني مااحقق فيها اي تقدم على هالحماس عندي أهداف تعليميه واجتماعيه ودينيه 

أنا أول مره أكتب خطط او أهداف لسنه كاملة دائما خططي تكون قصيرة أجل يعني شهر ثلاث شهور على حسب 
من الخطط اللي كتبتها خلال السنه اللي فاتت وبعضها نفذتها وبعضها لا لكن احس اني راضيه عن نفسي بما اني حققت اللي كنت أتمناه بشده
1- تعلم اللغة الكوريه والانجليزية
زي ماانتم عارفين سجلت في دورة للغة الكوريه والحين ماشيه فيها تمام الحمدلله ولو انه صارت لي عوائق كثيره كنت بترك الدورة بسببها لكن صبرت وتحملت كل مااتذكر حلمي اللي أكبر من تعلم اللغة أتقوى أكثر 
بالنسبة للغة الانجليزيه اللغة الوحيده اللي مااحبها اللغة اللي تعبتني من جد درس دوره في معهد مستويين ووقفت يعني مااحس اني استفدت مره او مخي مقفل على هاللغة ماادري ايش السالفه لكن بماانها لغة مهمه ولازم اتعلمها قررت اتعلمها بطريقة ثانيه راح اذكرها مع الخطط للعام الجديد

2- افتتاح موقع اسلامي كامل
تحمست له كثير كنت ابي أفتح موقع فيه اقسام فقه وحديث وتفسير وتوحيد وثقافه اسلاميه عامه للمسلمين الجدد اللي يجهلون الاحكام ويكون باللغة الانجليزيه في البداية ومع الوقت راح أضيف الكوريه وبعض اللغات الأسيويه 
بس من أكبر العوائق اللي ماخلتني أقدم على هالخطوه ان ماعندي الخبره الكافيه في ادارة المواقع وكذا ولا لقيت أحد يساعدني او انا مابحثت أصلا 

3- المشاركة في أعمال تطوعيه
الحمدلله هذي السنه رحنا أنا ومجموعة بنات متطوعات لدار الأيتام مرتين وسوينا لهم حفله بمناسبة العيد 
وان شالله عندنا خطط قادمة غير عن دار الأيتام مثل زيارة مرضى السرطان ودار المسنين 
بس الله يعينا لعمل الخير

4- أحضر أحد دورات تطوير الذات 
حضرت دورة وحده كانت رائعه للأستاذ خالد المنيف بعنوان رحلة التغيير 

5- أقراء كتب كثير 
أنا مااعشق القراءة لاكن هذي السنه أول سنه أقراء فيها بشكل جدي 

تقريبا هذي أهم الأهداف او مااقول الاهداف لان بعضها جا بالصدفه بدون تخطيط مسبق 

                                                                     قائمتي لعام 2011
1- أكمل دراستي وان شالله ربي يعيني لاني متكيسله في الوقت الحالي 
2- راح أدرس انجليزي لكن هالمره راح أجيب معلمه في البيت تعلمني أتوقع هذي افضل طريقة عشان اتعلم اللغة كويس
3- ان شالله ربي يكتبلي سفرة لكوريا قولو أمين 
4- ان شالله بنهاية السنه تكون لغتي الكوريه ممتازة
5- راح أحسن علاقتي مع ربي وأتزود من أعمال الخير
6- علاقتي مع الناس أعترف انها مو جيده وحاولت أحسنها لكن مدري ليش أنا كذا بعيده عن الناس اللي حولي حتى صديقاتي نسيتهم راح أحاول احسن علاقاتي والله يعيني 
7- ان شالله أكون فرد مفيد للمجتمع بالأعمال التطوعيه أو بالنصيحه 
8- راح أغير المجتمع اللي حولي باذن الله للافضل 

ماراح أتمنى أشياء زياده عشان مااكون طماعه ولا يتحقق لي ولا شي منهم 

راح أقولكم على شي تونا أنا وأسرتي الكريمه بدينا نسويه الأسبوع هذا أتوقع انه من أهداف أبوي لسنه الجديده لانه يقول لازم نصير أسرة ايجابيه الصراحه حبيت أقتراحه خصوصا ان الواحد يتذكر الأمور الدنيويه وينسى الأخره 
أبوي أقترح علينا أن في يوم واحد من الأسبوع بعد صلاة العصر يعطينا درس خفيف في السيره أو الفقه او اي شي مفيد 
كان الدرس الأول في الفقه ولا تحسبونه درس درس لا يعني سواليف ومناقشات وأسأله 
أخواني الصغار هم اللي يستفيدون أكثر بما أنهم توهم بدو يصلون وكذا 

شكرا لأبوي وان شالله تستمر هالدروس لوقت أطول وأتمنى أن كل أسرة تعمل مثل ماعملنا أنت أو أنتي أقترحي على الأسرة الكريمه وراح تاخذون أجرهم ان شالله وممكن يوم مايكون فيه درس مثلا حفظ كم أيه من اي سورة 
والله شي حلو انا في البداية قلت يالله ايش عنده ابوي مااحنا فاضين ماافتكينا من الدراسه تجينا دراسه في بيتنا بعد بس لما سوينها كان الوضع عادي أنا أقراء من كتاب وابوي يتكلم بطريقة مبسطه عاميه عشان الصغار يفهمون وضحك والوضح كان حلو وبالعكس راح تتحسن العلاقات بين الأسرة وكذا  

تكلمت كثير صح ؟ 
الله يحقق لنا كل أحلامنا وأمنياتنا الصغيره والكبيره الجديده والقديمه الظاهره والباطنه

تحديث:
بمناسبة السنه الجديده فتحنا باب الحش أقصد عندكم كلام بتقلونه لي رايكم فيني نصيحه اي شي تفضلو هون وخذو راحتكم لاني ماراح اعرف من أنت((ترا روحي الرياضية عاليه  

لكل اللي مرو من هنا 

هناك 24 تعليقًا :

  1. آمين يـارب العالمين
    تتحقق كل أحلامك يـارب !! ونالين اللى فى بالك نـوارتي
    ..
    وأقتراح الوالد الله يحفظه فى محاله ~ عالمنا صـار مخيف ,, والمشـاغل صـارت تخلى الناس يـادوب لأحقين على أنفسهم
    فكذا أواصل الاسـرة بتقوا .. وتتعلمون اكثر وتكتشفون أكثر

    مودتي يـالغالية
    لقلبك (وردة)

    ردحذف
  2. حياك رين
    آمين وياك يارب

    ايه والله صدقتي الله يكثر من أمثاله ^^

    شكرا لك خيتو لتواجدك ولتعليقك الذوق
    نورتي

    ردحذف
  3. 3- ان شالله ربي يكتبلي سفرة لكوريا قولو أمين
    آآمييين يارب
    والله يقويييك ع الطااعة وحسن العبادة
    الموضوع اعطاني تفآآؤل كبييير
    خصوصا ان مشرووعاتك تفتح النفسس
    واصلي خيييتو =)

    ردحذف
  4. كل عاآم وانتـ بخير :)

    اللهـ يقدرنا ونحقق امانيناآ
    واحييك ع ما قدرتي تنسويه العآم

    بالتوفيق ^_^

    ردحذف
  5. صباح / مساء الورد ^_^

    ويارب تحققين كل أمانيج وأهدافج

    حماس صح D:
    خاصة أول ما ترتبين أفكارج وتكون أهدافج واضحة لج.. بس كل اللي عليج إنج تحافظين على هالحماس وبتوصلين أهدافج =)

    بالتوفيق عزيزتي ~

    ردحذف
  6. أول شي الله يخلي لك الوالد ويحفظه ويطول بعمره وعمر ابوي وامي ، خطوة رائعه جدا جلستكم للدرس انت لاتسمينه درس بقدر ماهي جلسه عائلية يسودها الحوار والثقافه

    أهدافج روعه ماشاء الله لاقوة الا بالله
    بالنسبة لللإنجليزي أن انصحج تتعلمينه وعشان تحبين تتعلمينه خلي لك هدف ، مدري ليش حاسه بيجي يوم راح نحتاج نعرف اللغة الانجليزيه يعني راح تكون اللغة العربية ضعيف واكيد هذا الشي بيعطي الاعداء فرصة لنشر سمومهم الفكريه بين الناس لجهلهم باللغة الانجليزيه واندثار اللغة العربيه الفصحى


    بالنسبة للموقع فكره ممتازه بس انصحك تكونين مع مكتب توعيه وتنسقين معهم لان ممكن احد يستقل الموقع وينشر فيه ديانات او عقائد باطله بلغات محد يفهمها الا أشخاص معينين


    الله يوفقك يارب

    ردحذف
  7. @h2.a.m.n

    أمين وياك خيتو
    الله يستجيب منك
    حياك منوره يابت

    ردحذف
  8. @Awoosha

    مساء الأنوار

    أمين وياك يارب
    ايه من جد حماس وبنفس الوقت خوف من ان كل هالكلام مايتحقق لاكن املي بالله كبير

    منوره عيوشه =)

    ردحذف
  9. @آمال الزهور

    آمين يارب
    صح كلامك نكسب جلسه عائليه بمااننا نادر مانجلس جلسه عائليه وحتى صرت مااحبها بس شكلي برجع عادي الوضع

    الانجليزيه مهمه ولازم اتعلمها الحين والا بعدين بس الله يعيني على نفسي واتعلمها

    الموقع يبيله شغل واجد فاالفكره ممكن تكون بعيده شوي ^^

    منوره خيتو امال شكرا لتواجدك هون

    ردحذف
  10. هلا والله ..

    كل عام وانتي بخير نونآآآ .. ومشاءالله عليك
    انجزتي انجازات طيبه فـ 2010

    بالتوفيق والله يحقق لك امنياتك

    ردحذف
  11. @ẽмan.н ♥

    اهلين ايمانو
    وانتي بصحه وسلامه

    وياك يارب
    منوره ياختي =)

    ردحذف
  12. صبـآحٍكٍ عسسـلً . . .
    كل عـآم و انيت بخيرٍ [ نورهـٍ ]
    أكبر مكسب ليً من 2010 اني تعرفت عليكٍ و اللهٍ (LL)"

    ان ششـآءً الله . الله يسهل لكٍ تعلم اللغه الكوريه و الـأنجليزيهٍ
    و تقدين تطرطنين علينـآ =D"

    شسمهً برضوً الله يوفقسٍ و يحفظكٍ
    و يسآعدك ع تحقيق احلـآمكٍ في 2011

    دمتيً لنـآ سآلمهٍ
    (LL)

    ردحذف
  13. يارب تكون سنة حلوة علينا وعليك يارب
    قولو أمييييييين
    =)

    ردحذف
  14. @» ضيـۈنــہ‘

    اهلن ضيوفه
    وانتي بخير يابت

    والله يشرفني التعرف عليك
    حتى انا اعتبره مكسب

    الله يدم هالمكاسب هع

    امين وياك
    منوره

    ردحذف
  15. @فاتن

    امييييييييين
    منوره فاتن =)

    ردحذف
  16. غير معرف1/08/2011 9:48 ص

    الله يحققلكـ كل أهدافك يارب :)

    أهدافك رآآئعة ..

    بالنسبة للغلة الانجليزية مثل هدفي هي السنة

    نفسي تكون عندي طلاقة فيها << متعوب على طلاقة ^^

    وكمان آخذ فكرة عن اللغة الكورية ان شاء الله

    وعجبتني كثيير فكرة الوالد الله يخليه لكم
    وان شاء الله أحاول أطبقها في العيلة :)

    تدوينة جميلة :)

    كل عام وأنتي أروع
    :):)

    ردحذف
  17. حياك خيتو
    آمين يارب واهدافك

    والله الانجليزيه مسببتلي ازمه
    موب راضيه تدخل راسي
    الله يعيني عليها

    آمين يارب والله يقويك وتسوينها

    وانتي اطلق ^_^
    نورتي =)

    ردحذف
  18. بالتوفيق ، والله يحقق لك ما تتمنين ، وكوني بارة بوالديك أكثر شيء ، حفظك الله .

    ردحذف
  19. اهلين اخوي
    أمين وياك يارب

    ان شالله انا احاول وان شالله يكونون راضين عني

    شكرا لك =)

    ردحذف
  20. الله يحققلك امنياااتك اهم شئ التفاؤل يسعدك ربي
    موفقآ

    ردحذف
  21. آمين يارب وياك
    حياكي خيتو
    نورتي =)

    ردحذف
  22. كل عام وأنتِ بسعادة
    أتمنى تتحقق كل الامنيات
    ربي يجعلها سنة مليئة بالإنجازات
    دمتم بكل تفاؤل
    ^^ ^^

    ردحذف
  23. وأنت بصحه وسلامه
    آمين يارب الله يسمع منك

    ويحقق كل أمانينا

    شكرا ^^

    ردحذف
  24. كل عام وانتي بخير والزوار بخير (بعد مرور شهر >< )

    سنه فعلا حتى انا متفائل فيها لحد الان

    2011 من بدايتها كانت فيه احداث اكشن وحماس
    خخخخخ الله واعلم شلون بتكون نهايتها


    تمنياتي لك بتحقيق طموحاتك

    ردحذف