03‏/08‏/2012

شهر الأكل..!



السلام عليكم ورحمة الله وبركاته 
 كيفكم..؟وكيف الصيام و رمضان معاكم..؟!

موضوع اليوم عن المطبخ في رمضان بصراحة أنا يمين والمطبخ في الضفة اليسار 
يعني مابينا اي توافق وفي رمضان عكس كل البيوت مطبخنا يصير مهجور 
لكن الموضوع صار يشغلني بما اني رمضان الجاي ان شالله بصير اسوي اكلات رمضان وكذا 
اول حاجة بصراحة أنا استنكر الاكل الكثير في رمضان الزحمه والحوسه اللي تصير في المطبخ خلال هالشهر تحسسك انهم مااكلوا من سنتين وللاسف في الحقيقة نص اليوم نايمين 
تجيك السفره فيها لقيمات وسمبوسه ومعجنات وشوربه وصنفين حلا وفيمتو وعصير.......الخ 
"ماذا يحدث هنا ياجماعه تحس اننا راح نومت من الجوع الا شوي


ويبداء مشروع الطبخ والنفخ من الساعة 2 الظهر والعالم مشغولة بالأصناف اللي كل واحد أحلا من الثاني وكل يوم أصناف جديدة التكرار ممنوع طبعا 
طبعا أكبر متضرر الأم والبنات والخدامة لاصلاة ولا عبادة بس يحسون في هالأصناف اللي مالها اول ولا تالي حتى لما يروحون جمعه كل سواليفهم احنا نسوي كذا في الفطور وفعلنا كذا في السحور >> وشوله مجتمعين طيب

||


اليوم كنت امشي في الطريق لبيت جدتي شوفت منظر يحزن 
حرمه ومعاها طفلين جالسين على الزفلت الحار ينتظرون احد يتصدق عليهم باي حاجه يفطرون عليها 
والبيوت تعجز بريحة القلي وبالاطباق من كل شكل ولون 
ولا احد يفكر ان فيه ناس كذا موجودين في الحي
انا مااقول لاتاكلون بس التوازن شي جميل يعني اهدا من كذا ياجماعه مايصير 
للأسف بدل مايصير رمضان شهر الرشاقة صار مشاريع تسمين 

الواحد لما يخلص من الفطور يروح التراويح بالقوة يمشي رجولة من كثر الفرم 
طبعا ماينتهي مسلسل الأكل عند الفطور بعد التراويح فيه سفره عظيمه برضو وفي أخر الليل سفرة السحور 
ويستمر المسلسل لين أخر يوم برمضان 


||

الهدف من التدوينه:
"وكلوا وأشربوا ولا تسرفوا انه لايحب المسرفين"

عزيزتي الأم والأخت والزوجه شكرا ويعطيكم العافية على كل الجهد المبذول في اعداد الفطور لين السحور أمسكوا هذي الوردة لكم 
وجعل يدينكم محرمه عن النار والله لايحرمكم الأجر 

هناك 8 تعليقات :

  1. أي صحيح كلامك 100% بس هم يعني من الجوع يجلسون يطبخون ويطبخون ونفسهم بكل حاجة عادي ويقولون ماراح تكفي من جوعهم وبداية السفرة 5دقائق خلاص شبعوا هو بس لعب بالنعمة استغفر الله العظيم !
    يعني ياليتهم يتصدقون او يفطرون من فطورهم للمسلمين بالممسجد يوزعونها فيه كثير مايفطور مو لاقين شئ يعني يجهزون الفطور واذا واضح فيه زايد او الام تسوي زياده ويوزعها الاب ولا الاخ على العمالة او المحتاجين برمضان كثير :) والله يكتب لهم الاجر ان شاء الله

    ردحذف
    الردود
    1. ههههههههه اي والله يجلسون يشتهون الاكلات ويطبخونها
      بس الله يهديهم كذا اسراف واللهي :(

      حذف
  2. والله كل كلمه قلتيها صححيح

    بس اذا انتي ماتبين تسرفين سوي من كل شيء قليل مثلا سمبوسه سوي منها قليل ولقيمات قليل <<بكذا صح يكون تنوع بالاكل وبنفس الوقت يكون قليل عشان مايجلس شيء منه واخرتها يترمي وناخذ ذنب

    حبيت اعطيك ملاحظه صغيره :$

    "وكلوا وأشبوا ولا تسرفوا انه لايحب المسرفين"
    ^^ عدلي كلمه اشربوا :$
    شكرا

    ردحذف
    الردود
    1. صح عليك هموسه المفروض يسوون كذا وبلاش الاكل الكثير علي الفاضي
      شكرا للملاحظة جاري التعديل.......!!

      حذف
  3. يسلم بؤك يا بطلة على هالكلام.. هذا أولاً

    ثانياً ،، إنتظرتك بالهالتدوينة تقولين أنك مكروفة وجالسة تتدربين وكورسات وكذا ههههههههه

    ثالثاً .. كلامك جميل ومفيد والله يتقبل منا ومنكم الصلاة والصيام والدعاء إنه سميع مجيب ..

    ردحذف
    الردود
    1. الله يسلمك خيتو
      ههههههههه استني لاحقين على الحوسه الله يعينا :"(
      اميييين يارب منا ومنك ^^

      حذف
  4. غير معرف8/20/2012 9:09 م

    كلآمكٍ صحيحٍ
    اهوص لـآ من الطبخ المبآلغ فيةةٍ
    و لا حتى التجهيز الي قبل رمضَـآنٍ ! يعني العربيةة جبلٍ
    نتكلمٍ و نتكلمٍ و محد يسمعً
    الله الهآديً بسً ♥
    -
    كلٍ عآم و انتي بحيرٍ نورةةٍ :$ ♥ ♥

    ردحذف
    الردود
    1. هلا ضيونه
      ايه ماحولك احد بس يله على الاجر
      وانتي بخير يامي :$

      حذف