وصلنا الدايسو

السلام عليكم ورحمة الله وبركاته 

الدايسو ماأدراك ماالدايسو خخخخخ 

قلتلكم في التدوينه الي قبل اني مترت الرياض أدور المحل

بس اكتشفت في الاخير انه في خريص 

المهم يوم جا من بكره قومتني امي الظهر تقولي نوره تروحين معي السوق

قلت هاه مااشتهيت 

قالت بوديك الدايسو 

انا هاه! يالله يالله 

ركبنا السيارة ووصلنا خريص بلازا 

أنا أقولهم موب فيذا وهم يقلون الا

امي تقول مااخبر ان فيه عثيم مول ثنين 

المهم دخلنا كان وقت المغرب صلينا

وتونا بنبدء رحلة البحث بس امي قالت خلني اسال قبل 

سألنا رجل الامن قال موب هنا في العثيم مول 

طلعنا من خريص ومشينا ومشينا

جت لوحه مكتوب عليها الدمام

أمي قالت معد بعد ذي شي 

خلاص بنرجع

أنا أنددددييييه(لا) شوي خلنا نمشي 

واخيرا ظهرت لنا لوحه العثيم مول 

دخلنا وعلى طول الدور الثاني بجنب ستي ماكس على ذمة بنات الاقلاع

مشينا شويات ولقينه 

واخييييييييييييييييييييييييييرا واللي ناوي يروح لايضيق صدره لان السوق موب كبير مررره يعني بيلقاه بسرعه 

بغيت أنهبل يوم طلعت لي لوحته من بعيد 
دخلت المحل الانطباع الأول أنه محل أبو ريالين بس متطور 
هو اصلا محل ابو سبعه ريال لان اغلب بضاعته بسبعه او سته المحل مرتب ومقسم الاواني..الالعاب..مستحضرات التجميل..القرطاسيهوقشه واجد وشي تعرفين وشو وشي مدري وشو 
لان البضاعه مكتوب عليها بالياباني والكوري((أهم شي 
والعربي بس بعض الاشياء مايكتبون عليها بالعربي 

هذي الحصالات يااني خقيت عليها خقه بغيت اخذلي وحده

بس قلت موب مستفيده منها يمكن المره الجايه 

هذي مهفات((قولي قا

خذت لي وحده منها

اكوابهم كيوووووت 

أصلا موعينهم كلها كيووووت

خذت واحد طبعا

الحين بوريكم الاشياء اللي شرينها انا وامي واختي خمينا المحل

هذي أكياسنا

هذي ألعاب ذكاء أمي ماخذتهم 

وهذي مهفتي يااني خقيت أول ماشفتها

وهذا الشي أكياس بلاستيك كبيرة وتتسكر بسهوله تحطين فيها المفارش مثلا طبعا امي مخذتها

تعليقت جوالي كووووت فار وفارة

هذا الشي لو عندك بلوزه سانه ماعليها صور ولا كلام ولا شي تخذين هذي وتلزقينها عليها وتكوينها عشان تلزق

عجبتني وخذت هذولي

هذا منديل امي خذته فيه فكره بس مااسلت امي عنه لان مكتوب عليه مناديل قابل للاذابه بسألها واقولكم

اليابانيات موب احسن منا وشريت ماسك للوجه هذا غالي بـ24

طبعا غالي بالنسبة لباقي الاشياء اصلا قسم التجميل حسيته هو اغلى شي

الأول دفتر والثاني مذكرات مره عجبني شكلها كيووووت

شكل المذكرات من جوا

اللي قهرني ان قسم القرطاسيه اللي يعتبر افضل شي عندي مشفوووط

هذي حلوه بعد زي الشاخوله بس للقهوة أو الشاي

تحطينها فوق الكوب عشان يصير الشاي صافي بدون شوائب 

ومصنوعه من الورق

هذا الشي مثل الظرف تلزقينه أخر الكتاب أو الدفتر 

تحفظ لك الأوراق عشان ماتضيع مثل كذا 

نوت ثنين مع بعض 

عجبني شكله 

هذولي تعليقات جوال على شكل نوت تكتب فيها ملاحظات صغيرة 

شكلها بعد ماعلقتها على جوالي

ملاعق أكل صينية 

عندي منها بس مليت منهم وشريت جديده

اللي في الوسط حديد دائما ياكلون بهافي الدراما بس مالقيتها في المحلات الصينيه عاد يوم لقيته عندهم خقييت 

هذي علبة مقسمه أقسام صغيره تحطين فيها الحلقات عشان ماتضيع 

أنا كان عندي مثلها بس صغيييره بس خمس أقسام وماتستهال سعرها تقريبا كان 20 ريال

وهذي كبيرة وبـ7 ريال فقط

هذي البلاستيكة اللي تنحط على الجوال عشان تحافظ على الشاشه

أختي خذت وحده لها ووحده لدي اس

نوت أختي ماخذتهم الأحمر فيه منه حبتين عطتني واحد 

هذا الشي أمي شرته ححطينه في الكعب عشان يصير أريح

هذي عجبتني تحطين فيها القطن وتسحبين وحده من التحت 

شكلها حلو على التسريحه او في الحمام 

هذي شكلها كيووووت 

فايدتها مثلا لو عندك مارشملو وشوكلاته بدل ماتحطين عود أسنان تحطينها شكلها أحلى

 أمي ماخذته تحطيه على شعرك اذا سويتي حمام زيت

هالشي فكرته حلوه 

لبتن فاضي وانتي تحطين جواه شاهي التلقيمه 

هالشي الكيوت تحط جواه الجوال شكله ظريف

واللي جمبه الكوب بتاعي

صورة جماعية للخرابيط اللي شريتها أنا =)

وبس خلصنا والحساب طلع أربع ميه وشوي 

엄마 정말 고마워